Ved utgangen av månaden var 5 789 personar i Vestland registrerte som heilt arbeidsledige. Dette er ein liten auke sidan juli i fjor, og like under landsgjennomsnittet på 1,8 prosent.

Forventar auke

Som dei førre månadene er det spesielt ein bransje som skil seg ut. Bygg og anlegg har ein auke i arbeidsløysa på nær 50 prosent samanlikna med same månad i fjor. Samstundes har tilgangen på ledige stillingar i bransjen gått ned med 54 prosent.

Det er flest ledige innan bygg og anlegg (748), serviceyrke (581) og industri (574).

– Utviklinga i bygg og anleggsbransjen er ofte ein temperaturmålar på kva vi kan stå føre i resten av marknaden.  Det kan vere eit teikn på at marknaden er i ferd med å snu, seier fungerande direktør Frode Storvik i Nav Vestland.

– Men akkurat no er det største utfordringa at verksemdene ikkje klarer å finne kvalifisert arbeidskraft i fleire bransjar, særskilt innan helse, legg Storvik til.

Mange kommunar har under 1 prosent ledigheit

Talet på ledige stillingar går litt ned sidan juli i fjor, med 3 154 utlyste stillingar. Det er flest ledige jobbar i helsesektoren (777), reiseliv og transport (357) og industriarbeid (286).

18 av kommunane i Vestland har ei arbeidsløyse på 1 prosent eller mindre. Høgast ligg Hyllestad (5,5 prosent), Osterøy (2,6 prosent), Årdal og Bergen (begge 2,1 prosent).

Her finn du tal for alle kommunane i Vestland.

 

Arbeidsmarknaden i Vestland, juli 2023

 

 

For kommentar til meldinga, kontakt:

Frode Storvik, fungerande direktør i Nav Vestland, mobil 91 75 02 77

Birgitte B. Lygre, senior kommunikasjonsrådgjevar, mobil 90 50 70 96