Nesten ei stilling til kvar ledige

Det er 540 fleire heilt ledige enn på same tid i fjor. Samstundes har talet på ledige stillingar auka med nær 30 prosent samanlikna med juni i fjor.

Det var i juni 5 326 utlyste stillingar i Vestland, noko som betyr at det nesten er like mange ledige stillingar som det er arbeidssøkarar.  Nær halvparten av stillingane er i Bergen.

– Ikkje nødvendigvis enkelt å få jobb

Butikk- og salsarbeid toppar lista over ledige jobbar, med over 1 410 utlyste stillingar. Deretter følgjer helse, pleie og omsorg (901), bygg og anlegg (457) og reiseliv og transport (379).

Fylkesdirektør i NAV Vestland, Bjarte Hysing-Olsen, seier at mange ledige stillingar ikkje nødvendigvis betyr at det er enkelt å få jobb.

– Mange bransjar har behov for fleire tilsette i ein travel sommar. Mange av desse har få krav til kompetanse. Samstundes er det nok ein viss mismatch mellom kompetansen til de ledige og behova i marknaden. Her er det viktig at arbeidsgivarane og NAV samarbeider godt om kvalifisering av arbeidssøkarane, slik at dei kan fylle dei ledige stillingane, seier Hysing-Olsen.

Stor auke i bruk av lønstilskot

NAV har fleire arbeidsmarknadstiltak som kan bidra til å auke kompetansen til arbeidssøkarar. Bruken av desse tiltaka har auka med over 50 prosent samanlikna med juni i fjor. Det er særleg lønstilskot og arbeidspraksis som blir nytta i større grad enn i fjor.

– Det er veldig positivt at arbeidsgivarar i større grad ser at dei må vere med på kvalifiseringsarbeidet sjølv. NAV har mange hjelpemiddel som kan gjere det enklare for verksemdene å gjere dette, seier Hysing-Olsen.

Berre tre av dei 43 kommunane i Vestland har over 2 prosent arbeidsledige. Det er Hyllestad (3,6 %), Askvoll (2,2 %) og Bergen (2,1 %).

Arbeidsløysa i landet samla er på 1,9 prosent. 

Tal for alle kommunane i Vestland ligg under relatert innhald.

 

For kommentar til meldinga, kontakt

Bjarte Hysing-Olsen, fylkesdirektør i NAV Vestland, 48 24 73 18

Birgitte B. Lygre, senior kommunikasjonsrådgjevar, 90 50 70 96