Ved utgangen av februar var 6 010 personar heilt arbeidsledige i Vestland. Dette utgjer 1,8 prosent av arbeidsstyrken og er så vidt under snittet for heile landet. Arbeidsløysa i fylket har gått ned med over 1 300 personar sidan februar i fjor.

– Det er gledeleg å sjå at reiseliv og transport har få permitterte og langt færre ledige no enn på same tid i fjor. Den generelle arbeidsløysa i fylket har vore nokså stabil sidan sommaren når vi tek høgde for naturlege sesongvariasjonar, seier direktør Anne Kverneland Bogsnes i Nav Vestland.

Helsevesenet treng sommarhjelp

Ho anbefaler ungdom å starte jakta på sommarjobb. 
– Arbeidsgivarane er tidleg ute med å annonsere stillingane, og dei som ikkje allereie har fått jobb har ein god sjanse no. Det er særleg mange ledige stillingar i helse- og omsorgssektoren som kan gi verdifull arbeidserfaring, seier Bogsnes.

Ho oppmodar til å følgje med på utlysingar og kontakte bedrifter ein har lyst til å jobbe for. I starten av mars er det utlyst over 1 400 sommarjobbar i Vestland på Nav-tenesta arbeidsplassen.no.

Stor variasjon mellom kommunane

Dei fleste kommunane i Vestland har ei arbeidsløyse på mellom 1 og 2 prosent. Høgast er den i Ulvik (5,1 prosent), Eidfjord (4,7 prosent) og Austevoll (3,8 prosent). 

Her finn du tal for alle kommunane i Vestland.

Talet på utlyste stillingar har gått ned sidan i fjor, men framleis var det over 6 000 ledige stillingar i Vestland i februar. Det er flest ledige jobbar innan helse (1 692), reiseliv og transport (608) og butikk (546). 

Arbeidsmarknaden i Vestland, februar 2023 

For kommentar til meldinga, kontakt:

Anne Kverneland Bogsnes, direktør i Nav Vestland, mobil 90 52 10 59

Ingunn Halvorsen, senior kommunikasjonsrådgjevar, mobil 97 08 92 09