– Vi registrerer ein vedvarande auke dei siste fem åra frå 4,6 prosent til 5,6 prosent sjukefråvær. Dette kan synest lite, men det utgjer svært mange tapte dagsverk i eit stort fylke som Vestland, seier direktør Anne Kverneland Bogsnes i Nav Vestland.

Mindre luftvegssjukdom

Det legemelde sjukefråværet i fylket enda på 5,6 prosent i andre kvartal 2023 mot 5,4 prosent i same periode i fjor. Sjukdomsbiletet har endra seg ved at langt færre har sjukdom i luftvegane. Desse utgjer berre 6 prosent av dei tapte dagsverka, ned frå 27 prosent i fjor.

Muskel- og skjelettplager (34,4 prosent) og psykiske lidingar (24,7 prosent) er dei to store diagnosegruppene. Mykje av auken sidan i fjor kjem blant kvinner.

Fleire er lenge borte frå jobben

– Samla ser vi ein auke som vi ikkje hadde venta no når pandemien er tilbakelagt i denne omgang. Eg er særleg uroa for utviklinga i psykisk sjukdom. Vi ser også at langtidsfråværet aukar, seier Bogsnes.

Ho peikar på at det er viktig å halde kontakt med arbeidsplassen dersom ein klarer det under sjukemeldinga. Ei gradert sjukemelding der den tilsette kan jobbe litt, verkar også positivt for å kome tilbake i arbeid.

Helse- og sosialsektoren har høgast fråvær med 8,3 prosent. Andre store sektorar som undervisning, overnatting og servering, offentleg administrasjon og forsvaret har også auke i fråværet. Eit unnatak er industrien som ligg stabilt på 4,5 prosent.

Sjukefråværet i Vestland, andre kvartal 2023

• Høgast fråvær i kommunane Hyllestad (8,3 prosent), Øygarden (7,0 prosent) og Askøy (6,9 prosent).
• Lågast fråvær i Aurland (3,4 prosent), Gloppen (4,0 prosent) og Solund (4,2 prosent).
• Sjukefråværet i Vestland ligg litt over landsgjennomsnittet på 5,5 prosent.

Tal for alle kommunane i Vestland finst på statistikksidene våre.

For kommentar til meldinga, kontakt

Anne Kverneland Bogsnes, direktør i Nav Vestland, 90 52 10 59

Ingunn Halvorsen, senior kommunikasjonsrådgivar, 97 08 92 09