Det legemelde sjukefråværet i fylket enda på 4,8 prosent i tredje kvartal 2023 mot 4,7 prosent i same periode i fjor. Langt færre er borte frå jobb med sjukdom i luftvegane, medan fråværet grunna psykiske lidingar og muskel- og skjelettlidingar aukar.

Muskel- og skjelettplager (35 prosent) og psykiske lidingar (24 prosent) er dei to store diagnosegruppene. Mykje av auken sidan i fjor kjem blant kvinner. 

– Sjukefråværet har auka mest i aldersgruppa 20–39 år, og mykje av auken gjeld sjukefråvær med psykiske lidingar. Eg er særleg uroa for utviklinga i psykisk sjukdom blant unge, seier direktør Anne Kverneland Bogsnes i Nav Vestland.

Bogsnes synast det er positivt å sjå at delen graderte sjukmeldingar aukar i Vestland, frå 19,7 prosent i fjor til 22 prosent i år.

– Ei gradert sjukemelding der den tilsette kan jobbe litt, kan verke positivt for å kome tilbake i arbeid, seier ho.

Helse- og sosialsektoren har høgast fråvær med 6,8 prosent. Andre store sektorar som undervisning, overnatting og servering, transport og lagring og bygg og anlegg har også auke i fråværet.

Fakta om sjukefråværet i Vestland i tredje kvartal 2023

• Høgast fråvær i kommunane Hyllestad (6,3 prosent), Øygarden (6,2 prosent) og Austrheim og Askøy (begge 5,9 prosent).
• Lågast fråvær i Eidfjord, Sogndal (begge 3,7 prosent) og Solund (3,5 prosent).
• Sjukefråværet i Vestland er det same som landsgjennomsnittet på 4,8 prosent.

Tal for alle kommunane i Vestland finst på statistikksidene våre.

For kommentar til meldinga, kontakt:

Anne Kverneland Bogsnes, direktør i Nav Vestland, 90 52 10 59

Birgitte B. Lygre, senior kommunikasjonsrådgivar, 90 50 70 96