– Sjølv om talet på mottakarar av uføretrygd har auka i fyrste kvartal, gjer det ikkje utslag på andelen uføretrygda. Den er uendra samanlikna med førre kvartal, seier arbeids- og velferdsdirektør Hans Christian Holte.

Dei siste åra har andelen uføretrygda i befolkninga vært stabil på om lag 10,5 prosent.  

– Andelen uføretrygda aukar med alderen, og det er særleg mange kvinner i alderen 45-67 år som får uføretrygd, seier Holte.

Figur 1. Talet på mottakarar av uføretrygd (venstre akse) og prosentdelen mottakarar 18-67 år* (høgre akse). Per kvartal 31.3.1996-31.3.2023.

Overgangen frå AAP

Dei fleste nye uføretrygda har ei fortid som mottakarar av AAP. Andelen som kjem frå AAP i løpet av 1. kvartal 2023 var på 65,3 prosent. Dette er ein nedgang på 2,4 prosentpoeng samanlikna med same periode i 2022. At andelen frå AAP har gått noko ned, kan mellom anna skyldast at fleire AAP-mottakarar har fått forlenga si periode med ytinga. Me antar at talet som sluttar å få AAP og startar å få uføretrygd vil auke mot slutten av året, lik trenden frå tidlegare år der andelen aukar gjennom året.

Uføreandel og aldersvariasjonar per fylke

Samanlikna med førre kvartal har prosentandelen som får utbetalt uføretrygd i alderen 30-34, 40-44 og 55-59 år auka. For uføre i alderen 45-54 og 60-67 år har prosentandelen gått ned. For dei andre aldersgruppene var andelen uføre stabil.

Figur 2. Prosentandelen mottakarar av uføretrygd 18-29 år etter fylke. 31.3.2023

Det er særleg stor variasjon i andelen unge uføre (18-29 år) fordelt etter fylke. I Oslo (1,4 %) var det klart færrast unge uføre, medan det var klart flest i Vestfold og Telemark (3,8 %), Innlandet (3,5 %) og Agder (3,4 %).

For meir om unge uføre og fylkesforskjeller, sjå Arbeid og velferd nr. 3, 2022.

Flest fekk uføretrygd i Agder, Nordland og Innlandet

Andelen som fekk uføretrygd i prosent av befolkninga var høgast i Agder og Innlandet (14,2 %), Nordland (13,5 %) og Vestfold og Telemark (13,3 %), medan det var færrast i Oslo (6,3 %).

– Fylke med høg prosentandel eldre har òg ein høg prosentandel som får uføretrygd. Yngre befolkning trekkjer derimot prosentandelen som får uføretrygd ned. Det same gjer ein meir fleksibel og variert arbeidsmarknad i hovudstadsregionen. Lokale variasjonar i helse- og utdanningsnivå vil òg ha innverknad på kor mange som mottek uføretrygd, seier Holte.

Sjå uførestatistikken per mars 2023

For meir informasjon, kontakt pressevakta hjå Nav på e-post presse@nav.no eller telefon 400 03 144.