Erklære farskap

Foreldreansvar er den retten og plikta foreldre har til å bestemme over barnet i personlege forhold. Foreldra skal utøve foreldreansvaret ut frå barnets behov og interesser. Den eller dei som har foreldreansvar, er også verjer for barnet.

For barn som vert født etter 1. januar 2020 får mor og far felles foreldreansvar. Dette gjeld barn som har

• gifte foreldre
• sambuande foreldre
• foreldre som ikkje bur saman

Dersom mor ønsker å ha foreldreansvaret åleine må ho melde frå til Folkeregisteret om det innan eitt år frå den dagen farskapet er fastsett. Om far er ueinig i dette, og ønsker foreldreansvar, må han sjølv ta saka til domstolen.

Dersom far ikkje ønsker å ha foreldreansvar må han melde frå til Folkeregisteret om det innan eitt år frå den dagen farskapet er fastsett.

Foreldre med foreldreansvar kan velje namn til barnet. Dei må sende melding om namnet til Folkeregisteret (skatteetaten.no).

Dersom foreldra ikkje gir melding om etternamn innan 6 månadar etter at barnet er født, får barnet automatisk etternamnet til mora.

Når farskapet er gyldig fastsett, har barnet arverett etter far.

Barn har rett til samvær med begge foreldra når dei ikkje bur saman. Foreldra har eit gjensidig ansvar for at samværsretten til barnet blir oppfylt.

Dersom foreldra ikkje blir einige, kan dei ta saka inn for retten.

Barn har rett til å bli forsørga av begge foreldra, også når foreldra ikkje bur saman. Retten gjeld til og med den månaden barnet fyller 18 år. Etter fylte 18 år kan barnet ha rett til å bli forsørga gjennom vidaregåande opplæring.

• Forelderen som ikkje bur fast saman med barnet, skal vere med å forsørge barnet ved å betale barnebidrag.
• Barnebidrag er i utgangspunktet ein privat sak, og det er opp til foreldra å bestemme beløp og anna innhald i avtalen. Dersom foreldra ikkje vert einige, kan det søkast om at NAV fastsett barnebidraget.
• I tilfelle der foreldra ikkje bur saman når barnet blir født, og det ikkje er gjort avtale om barnebidrag, skal NAV fastsette bidraget av eige initiativ.

Farskap som er fastsett i utlandet, kan bli godkjent og registrert i Norge. Dette vil bli vurdert i kvart enkelt tilfelle.

Dersom farskapet vert godkjent i Norge, får far dei same rettane og pliktene som når farskapet har blitt fastsett i Norge.

Dersom barnet ditt er født i utlandet, og du ønsker å fastsette farskapet i Norge, kan du kontakte NAV for rettleiing og informasjon. Dette gjeld berre når farskapet ikkje allereie er fastsett i utlandet. 

Du kan ta kontakt enten via «Skriv til oss», eller ved å ringe 55 55 33 33. Du må opplyse om namn, fødselsdato og opphaldsland for både barnet og barnets mor.

Skriv til oss

Mor må oppgje deg som far

Før du kan erklære farskapet, må mora til barnet oppgje deg som faren til barnet.

Dersom mor og barn bur og oppheld seg i utlandet, må mor personleg møte opp på ein norsk utanriksstasjon. Der må ho skriftleg oppgje deg som far til barnet.  
 
Mor må på førehand avtale eit møte med utanriksstasjonen. Her kan de òg søke om pass og fødselsnummer for barnet. Utanriksstasjonen vil gi meir informasjon når mor tek kontakt for å avtale møte.  
 
Dokumentasjon som mor må ta med til møtet: 

• Gyldig legitimasjon for mor, anten pass eller nasjonalt ID-kort.
• Original fødselsattest for barnet som er legalisert, og omsett til engelsk eller norsk.
• Original dokumentasjon om sivilstatusen til mor då barnet blei født. Denne må vere omsett til engelsk eller norsk. 

Når vi har fått kopi av dokumentasjonen, samt dokumentet der mor oppgjer deg som far, vil vi vurdere saka og gi deg vidare beskjed. Du vil enten bli bedt om å gi ei DNA-prøve, eller få moglegheit til å erklære farskapet.

Når barnet er født i utlandet, men mor og barn bur i Norge, kan mor møte på NAV-kontoret for å oppgje kven som er far til barnet. Her må mor levere

• kopi av barnets fødselsattest, som er legalisert, og omsett til engelsk eller norsk. 
• dokumentasjon på eigen sivilstatus på fødselstidspunktet til barnet.

I etterkant av møtet vil mor få informasjon om kva som skjer vidare. Vi kontaktar også far dersom og når han kan erklære farskapet.

Når barnets surrogatmor er ugift, kan du erklære farskapet på ein norsk utanriksstasjon. Surrogatmoren må deretter godta erklæringa.

Personleg oppmøte

Både erklæring om farskap og godkjenning av erklæringa krev personleg oppmøte. Norske utanriksstasjonar kan hjelpe i prosessen med utfylling av skjema. Ta kontakt med ein norsk utanriksstasjon i god tid før barnets fødsel for å gjere avtale med utanriksstasjonen. 

Utanriksstasjonen vil sende utfylte skjema til enten NAV eller Skatteetaten, som vil vurdere saka.

Dersom barn og far oppheld seg i Norge

Dersom barnet allereie har kome til Norge og far til barnet oppheld seg her, kan erklæring om farskap og DNA-prøver gjerast i Norge. Ta kontakt med NAV for meir informasjon.

Surrogatmor må likevel møte personleg ved norsk utanriksstasjon for å godkjenne erklæringa. NAV vil oversende erklæring om farskap til utanriksstasjonen for signering.

Dersom surrogatmora til barnet er gift, vil ektefellen hennar vere barnets far etter norsk lov. I slike situasjonar må farskapet endrast til deg som far til barnet. Du må vere busett i Norge, og erklære farskapet til barnet. Surrogatmora og ektefellen hennar må deretter godta erklæringa. I tillegg må du og barnet ta prøver for DNA-analyse.

Personleg oppmøte

Både erklæring om farskap, godkjenning av erklæringa og DNA-prøve krev personleg oppmøte. Norske utanriksstasjonar kan hjelpe i prosessen med utfylling av skjema og prøvetaking for DNA. Ta kontakt med ein norsk utanriksstasjon i god tid før barnets fødsel for å gjere avtale med utanriksstasjonen. 

Utanriksstasjonen vil sende utfylte skjema til NAV. Oslo Universitetssykehus vil sende resultatet av DNA-analysen til oss. NAV vil då vurdere saka, og kan endre farskapet ved vedtak.

Dersom barn og far oppheld seg i Norge

Dersom barn og far har kome til Norge, kan erklæring om farskap og DNA-prøver gjerast i Norge. Ta kontakt med NAV for meir informasjon.

Surrogatmora og hennar ektefelle må uansett møte personleg ved norsk utanriksstasjon for å signere erklæring om farskapet. NAV vil oversende erklæring om farskap til utanriksstasjonen for signering.

Dersom du er i tvil om at du er faren til barnet, skal du ikkje registrere eller signere på et farskap. I disse tilfella kan du bestille eit møte på det lokale NAV kontoret ditt, og vi vil rettleie deg gjennom det heile. Da får du uttale deg i saka, og kan be om ein DNA test.

Dersom du ikkje vil samarbeide om å fastsette farskapet, må vi sette inn tiltak. Dette kan vi gjere dersom mor har oppgitt deg som far, eller vi har opplysningar frå andre om at du er mogleg far til barnet.

Vi kallar først inn til eit møte der du får uttale deg. Det kan bli aktuelt å avklare farskapet ved DNA-prøve.

Dersom du vel å ikkje

• møte på innkallingar frå NAV, eller
• avlegge pålagt DNA-prøve

kan NAV stemne saka for tingretten. Dei har myndigheit til å tvangs-gjennomføre ei DNA-prøve, og legge dom på bakgrunn av resultatet.

Eventuelt barnebidrag kan bli vurdert fastsett tilbake til tidspunktet barnet blei født.

Dersom du er usikker på kven som er faren til barnet, kan vi hjelpe deg. Det gjer vi ved å møte deg, og du kan fortelje kven som kan vere moglege fedrar. Så kontaktar vi dei, og ber dei ta ein DNA test. På den måten kan vi saman finne ut kven som er den biologiske faren til barnet.

Som mor har du plikt til å uttale deg og gi opplysningar i ein farskapssak. Dette står i Barneloven §11.

Det er mange gode grunnar til å oppgi kven som er far

Barn har rett til å kjenne sine foreldre. Det handlar først og fremst om barnets kjenslemessige omsyn. Barn har også rett til å bli forsørga av begge foreldra sine, for eksempel gjennom barnebidrag. Det kan også oppstå arvelege sjukdommar, som gjer det viktig for barnet å kjenne sitt opphav. I tillegg kan barnet ha rett til barnepensjon dersom ein forelder går bort. 

Dersom du er far i ein slik situasjon, kan du kontakte oss i NAV for å få hjelp og rettleiing. Vi kontaktar mor for ei utsegn, før vi kallar deg inn til eit møte for ein samtale. 

1. Mor oppgjer far:
   • Mor loggar inn i løysinga for farskapserklæring
   • Mor oppgjer termindatoen
   • Mor oppgjer farens namn og fødselsnummer (11 siffer)
   • Mor stadfestar at personen som er oppgitt er faren til barnet
2. Far erklærer farskap:
   • Far får melding frå mor eller NAV med lenke til løysinga
   • Far loggar inn og kontrollerer opplysningane
   • Far stadfestar at han er kjent med rettsverknadane av å erklære farskap
   • Far signerer erklæringa
3. Erklæringa vert oversendt Folkeregisteret for registrering og arkivering.

1. Mor oppgjer far
   • Mor loggar inn i løysinga for farskapserklæring
   • Mor vel barnet ho vil oppgje far til
   • Mor oppgjer fars namn og fødselsnummer (11 siffer)
   • Mor stadfestar at oppgitt person er barnets far
2. Far erklærer farskap
   • Far får melding frå mor eller NAV med lenke til løysinga
   • Far loggar inn og kontrollerer opplysningane
   • Far stadfestar at han er kjent med rettsverknadane av å erklære farskap
   • Far signerer erklæringa
3. Erklæringa vert oversendt Folkeregisteret for registrering og arkivering