Totalt er det om lag 6 700 ledige jobbar i Vestland, og om lag 20 prosent av desse er feriejobbar.  Det er flest ledige jobbar innan helse, pleie og omsorg (1 507), reiseliv og transport (686) og butikk- og salsarbeid (643).

Arbeidsløysa er framleis låg, med 6 523 personar registrerte som heilt arbeidsledige i Vestland i februar. Det utgjer 1,9 prosent av arbeidsstyrken i fylket.  

God start på arbeidslivet

Fylkesdirektør Bjarte Hysing-Olsen i Nav Vestland seier dei som treng ferievikarar må hive seg rundt og lyse ut stillingane no. Saman med NHO Vestland og Vestland fylkeskommune har Nav Vestland i år lansert kampanjen «Sommarjobb i vest», for å vise fram dei unike moglegheitene som finst for ungdommar i Vestland.

–  Mange arbeidsgivarar vi snakkar med seier sommarvikarane er ein veldig viktig ressurs for dei, spesielt med tanke på å gi unge ei forsmak på yrke dei kan utdanne seg til. Eg oppmodar arbeidsgivarar til å bli med på kampanjen «Sommarjobb i vest», og på den måten bidra til å gi unge arbeidstakarar ein god start på arbeidslivet, seier Hysing-Olsen.

Mange bransjar treng folk

Navs eigne undersøkingar syner at mange bransjar har stort behov for å erstatte og tilsette nye personar i åra framover.  Aller mest kritisk er det i helse- og sosialsektoren, men også bransjar som undervisning, varehandel og transport har stort behov i åra framover.

– Arbeidsgivarar som tenkjer framover ser på sommarvikariat som ei god moglegheit for å vise fram bransjen sin. Ein sommarjobb kan hjelpe unge med å velje ei utdanning til et yrke der det vil vere behov for dei i framtida, seier Hysing-Olsen.

Arbeidsløysa i Vestland ligg på same nivå som i februar 2024, og under landsgjennomsnittet på 2,0 prosent heilt ledige.

Høgast ledigheit i fylket har Hyllestad med 5,5 prosent, og Ulvik med 4,4 prosent. Lågast ledigheit har Solund med 0,5 prosent og Stord med 0,8 prosent heilt ledige.

 

Arbeidsmarknaden i Vestland, februar

 

For kommentar til meldinga, kontakt

Bjarte Hysing-Olsen, fylkesdirektør i Nav Vestland, 48 24 73 18

Birgitte B. Lygre, senior kommunikasjonsrådgjevar, 90 50 70 96