Uføretrygd skal sikre inntekt til dei som ikkje kan jobbe på grunn av ein varig sjukdom eller skade. Ved utgangen av 2024 var 36 957 innbyggarar i Vestland registrerte med heilt eller delvis uføretrygd. Det er 9 prosent av befolkninga i yrkesaktiv alder, og 752 fleire enn på same tid året før. 

Nær dobla på ti år 

Aldersgruppa over 50-59 år har flest uføre. Men det er utviklinga blant dei yngre som uroar fylkesdirektør Bjarte Hysing-Olsen i Nav Vestland.  I aldersgruppa 30-39 år har talet på uføre nær dobla seg dei sist ti åra.  Berre sidan i fjor har det blitt nær 300 fleire uføre i denne aldersgruppa. 

– Vi finn også dei yngre igjen i sjukmeldingsstatistikkane, og vi veit at det er ein tett samanheng mellom sjukefråvær og tal på uføre.  Langvarig sjukefråvær er ein uføredrivar, seier fylkesdirektør Bjarte Hysing-Olsen i Nav Vestland. 

Talet på uføre i aldersgruppa 30-39 år er no høgare enn for dei mellom 60-61 år og 65-67 år, og på same nivå som dei mellom 62 og 64 år. 

–  Eg er bekymra. Psykiske lidingar er den vanlegaste uføreårsaken blant unge. Samstundes veit vi at det kan vere bra for mange med psykiske lidingar å vere i aktivitet. Vi veit av erfaring og frå forsking av mange i denne gruppa ønskjer å jobbe. Vi i Nav ønskjer å hjelpe til så godt vi kan. Vi har eit godt samarbeid  med både arbeidsgivarar, utdanningsinstitusjonar og helse som kan bidra til at dei som ønskjer det, kan kome i aktivitet, seier Hysing-Olsen. 

Store variasjonar mellom kommunane 

Med 9 prosent uføre ligg Vestland under landssnittet på 10,5 prosent. Samstundes har fleire kommunar i fylket høge uføretal. Vaksdal og Høyanger ligg over 13 prosent, medan Sogndal har lågast andel uføre med 6,5 prosent. 

Under relatert innhald til høgre finn du fleire tal om uføre i Vestland.

For kommentar til meldinga, kontakt 

Bjarte Hysing-Olsen, fylkesdirektør i Nav Vestland, 48 24 73 18 

Birgitte B. Lygre, senior kommunikasjonsrådgjevar, 90 50 70 96