Hev- og senkbar kjøkkenløysing

Hev- og senkbar kjøkkenløsning kan vere aktuelt viss du for eksempel bruker rullestol, har vonde skuldrar eller er kortvokst, og difor har vanskar med å bruke overskåp, kjøkkenbenk eller koketopp.

Du kan få motorar til hev- og senkbar kjøkkenløysing når omorganisering av kjøkkenet eller andre enklare tiltak ikke hjelper nok.

Viss produkt som er å få kjøpt i vanleg handel kan dekke behovet ditt, vil du ikkje få hjelpemiddelet av NAV Hjelpemiddelsentral.

Generelle vilkår:

• Du må ha behov for hjelpemiddelet på grunn av vanskar med bevegelse.
• Funksjonsvansken må vere varig. Med varig meiner vi at vanskane varar i meir enn to år.
• Hjelpemiddelet skal kompensere for funksjonstapet, og bidra til at du blir meir sjølvstendig i kvardagen.
• Du må være medlem i folketrygda.

NAV kan dekke motorar som hever og senker overskap eller kjøkkenbenk. NAV dekker også montering av motorane.

Motorane monterast bak eller inni kjøkkenskapet ditt, eller under kjøkkenbenk der det ikkje er skap under.

NAV dekker ikkje:

• kjøkkeninnreiing eller kjøkkenbenk
• armatur, blandebatteri eller kum
• kvitevarar
• koketopp eller komfyr
• lyssetting eller lamper
• forsterking i veggar og tak
• endring av vannrøyr og avløp
• nye strømkursar eller elektrisk anlegg

Vi anbefalar at du les denne artikkelen om tilrettelegging av kjøkken på kunnskapsbanken.net.

Du kan også få ei oversikt over dei vanlegaste løysingane på finnhjelpemiddel.nav.no

Når du skal tilrettelegge kjøkkenet er det mykje å setje seg inn i. Ei hev- og senkbar kjøkkenløysing kan bli kostbart sjølv om NAV dekker motorane. Det er difor viktig at du set deg inn i kva som er mogleg  og ikkje, og kva NAV kan dekke og ikkje.

Dersom du skal pusse opp, bygge om eller tilpasse eksisterande kjøkken, bør du vurdere om behovet ditt kan dekkes med andre, enklare løysingar og hjelpemiddel. Det finnast mange smarte løysingar for  å få eit funksjonelt kjøkken utan bruk av motorisert hev- og senkfunksjon.

Dersom du skal søke om hev- og senkbar kjøkkenløysing, må du vente med å bestille sjølve kjøkkenet til du har fått vedtak frå NAV Hjelpemiddelsentral.

Hjelpemidla lånast ut av NAV Hjelpemiddelsentral.

Viss du har hatt reiseutgifter på grunn av utprøving av hjelpemiddel, kan du søke om å få dekka reiseutgifter.

For refusjon av reiser til sjukehus og andre tenester som helseforetaka administrerar, søker du på pasientreiser.no.

Ta kontakt med kommunehelsetenesta i kommunen du bur i viss du har behov for hjelpemiddel til bustaden din. Dei vil kartlegge kva slags utstyr du treng og har best nytte av, ut frå funksjonsevnen, omgjevnadene og bustaden.

Dei vil også utforme søknaden for deg.

Det er viktig å vere klar over at fastmontering av hjelpemiddel kan innebere andre bygningsmessige utgifter. Desse dekker ikkje NAV, men du kan undersøke om det er mogleg å søke tilskot i kommunen du bur i. Slike tilskot vurderer ein vanlegvis opp mot kva økonomisk situasjon du er i.

Førebu deg, tenk gjennom løysingar og les om tilrettelegging av kjøkken på kunnskapsbanken.net.

Dette bør du undersøke viss du skal søke om hev- og senkbar kjøkkenløysing

• Finn fram aktuelle planteikningar
• Du bør få hjelp av kommunal hjelpemiddelformidler til å dokumentere noverande løysing med bilete og mål.
• Lag ei oversikt over eksisterande inventar.
• Viss du leiger bustad, må du be huseigar om å godkjenne monteringa.
• Viss du har planar om å byggje om kjøkkenet, er det lurt å kontakte NAV Hjelpemiddelsentral eller kommunen for å få gode råd om varig tilrettelegging.

Ein hjelpemiddelformidlar utformar søknaden på dine vegne. Kontakt kommunen du bur i for å få hjelp.

Du kan la ein fagperson (for eksempel kommunal hjelpemiddelformidlar eller ergoterapeut) få fullmakt til å fylle ut og sende inn søknaden på dine vegner. Da vil signaturen din på dette skjemaet erstatte signaturen på sjølve søknadsskjemaet.

Ved søknad om fastmonterte hjelpemiddel, må du signere godkjenningsskjemaet i tillegg til søknadsskjemaet eller eit fullmaktsskjema.

Er du fagperson?

Vi har eigne løysingar for deg:

Du får skriftleg vedtak når NAV har handsama søknaden din.

Når NAV Hjelpemiddelsentral fattar vedtak, bestiller vi prosjektering frå leverandør.

NAV Hjelpemiddelsentral, kommune og leverandør, samarbeider med deg om å finne ei løysing som passar for deg i bustaden din.

NAV Hjelpemiddelsentral får eit pristilbod frå leverandøren, godkjenner dette og bestiller hjelpemiddelet.

Dokumentasjon og eventuelle bygningsmessige endringar, må du ta deg av sjølv.

Leverandør avtaler tidspunkt for levering og montering med deg. Leverandør skal gje deg opplæring ved overlevering. Dersom du treng meir opplæring må du kontakte kommunen.

Det er ditt eller huseigar sitt ansvar å ta vare på utstyr eller bygningselement som vert demontert.

Leverandøren skal informere deg om kva du eventuelt må gjere i forkant av montering.

Ved montering av hev- og senkløysing på kjøkkenet er det viktig å koordinere kjøkkenleverandør, leverandør av hev- og senkmotor og håndverkar. Denne koordineringa er i utgangspunktet huseigar sitt ansvar.

Får du avslag på søknaden din, kan du klage til NAV Hjelpemiddelsentral. Du må ha sendt ein søknad som er blitt handsama for å kunne klage. Du kan ikkje klage på munnleg avslag.

Klage på vedtak

I vedtaket står det korleis du skal gå fram viss du skal klage, kven du skal klage til og klagefrist.

Anke vedtak

Viss du har fått eit vedtak frå NAV Klageinstans som du meiner er feil, kan du med nokon unnatak anke. I vedtaket kan du lese om fristen for å anke.

Du kan også bruke advokat eller gje fullmakt til ein person som klagar på dine vegner.

Gi NAV Hjelpemiddelsentral eller kommunen beskjed dersom det skjer endringar i livet ditt som vi bør vite om. Det kan for eksempel vere om du flytter, både internt i kommunen eller fylket, ut av landet eller på institusjon.

Dersom NAV skal flytte fastmontert utstyr, for eksempel fordi du flytter eller bytter skule, bør du starte prosessen i god tid. Ta kontakt med kommunal terapeut for mellom anna å få kartlagt nytt rom, vurdert om det må søkjast nytt utstyr og underskrift av huseigar.

Dersom du ikkje lenger skal bruke hjelpemiddelet, skal du levere det tilbake. Kommunen kan hjelpe deg med dette.

Du har sjølv ansvar for testing, reingjering og enkelt vedlikehald av  hjelpemidla dine. 

Dersom hjelpemiddelet går i stykker, tek du kontakt med teknikar i kommunen du bur i. Reparasjonar må utførast av fagfolk.

Viss du får behov for akutt reparasjon av hjelpemiddelet, skal du først ta kontakt med kommunen.

Viss problemet oppstår utanom opningstid, kan du ringe NAV Hjelpemiddelsentral sin servicetelefon for reparasjon av hjelpemiddel ved akutte behov.

Servicetelefonen har telefonnummer 91 78 11 22 og har ope klokka 15:30–24:00 på kvardagar og klokka 08:00–24:00 i helger og helligdagar. 

Når du ringer inn ein akutt reparasjon, vil Hjelpemiddelsentralen vurdere og avtale med deg kva tiltak som skal iverksettast ut frå slik du skildrar situasjonen.

Dersom problemet ikkje kan løysast over telefon og det vurderast som akutt, vil du få hjelp innan 24 timer.

Viss du ikkje skal bruke hjelpemiddelet lenger, skal du levere det tilbake. Ta kontakt med kommunen eller NAV Hjelpemiddelsentral for å få hjelp til demontering.

Fastmonterte hjelpemiddel kan ikkje byttast som andre hjelpemiddel. Det er behov for ny søknad med nye mål og signaturar dersom du treng noko nytt. Dette har samanheng med at regelverk og sortiment kan ha endra seg sidan forrige gong du søkte.